1. imɛŋən ikɛŋən βɵːsŋən. pirsʲa jisŋən. eːβi an tajsəŋən, pox an tajsəŋən. nɵːpətɬən xoɬam jupijən eːβi pox ɔːɬəŋən noməs paː an tajsəŋən. sʲiti βɵːɬtan saxat imeɬ ʃaːʃ nox puβɬəs. aːtəɬ ɔːɬəm ant oɬ, xatəɬ ɔːɬəm ant oɬ, ɬɵːŋ tur, kaːɬ tur uβəɬ. i moɬtijən ikeɬ pɛɬa lopijəɬ: “iki, ʃaːnʃɛm βuste! mɔːsəŋ mɵːʃəm jamaʃik jiɬ.” ikeɬ an ɬaŋxaɬ: “muj βurən maː xannɛxɵː nʲoxi keːʃijən βustəɬɛm?” imeɬ sʲiβ xɵːn xɵːɬənɬ. “iki, ɬoxta tijəŋ sʲoxri! pɵːxəɬme paː sʲi ʃaːnʃɛm!” iki tijəŋ sʲoxri ɬoxtəs. imeɬ ʃaːʃ pɵːxəɬməsɬe. ɬij jokana imeɬ ʃaːʃ eːβəɬt keːβ ʃɵːp kim raknəs. ikeɬ lopəɬ: “mitra sʲi! muj βurən xannɛxɵː nʲoxijən keːβ ʃɵːp ɛnməs?” βaːntiɬəɬɬe: “sʲikɛm jam keːβ ʃɵːp ɬeːsʲtana tajti.” βusɬe paː suŋ norəma βosʲkəsɬe. in imisaŋən jeːɬi βɵːɬmətsəŋən, jeːɬi xɔːɬmətsəŋən.
2. jeːtna jis. ɬɛsŋən jaːsʲsəŋən. ikileɬ iɬ oɬəs, imileɬ ɬɛtotɬaɬ pasana ʃaβisəɬɬe. ɬuβ paː iɬi oɬəs. aːɬəŋa jis, nox kiɬsəŋən. ɬɛt jaːnʲsʲi poraja jis, pasanən ɬɛtotɬaɬ xɔːɬʲeɬ tɛɬən antɵːm. “iki, muj pisʲ! xoj joxtiɬəs? ɬɛtotɬəmən xoɬ teːβəmət.” jeːtna jis, imi lopijəɬ: “tam puʃ nɛmasija ɬɛtotɬəmən pasana xajɬəɬɬam. aːtəɬən ant oɬti pitɬəm.” jeːtna jis, iɬ oɬsəŋən. ikeɬ βojəmsa, imileɬ βɛrti oɬ. sʲiti oɬtaɬ saːxat suŋ norəm eːβəɬ ɬaːpət taɬ, jaːŋ taɬ ɬoβat xɵː nʲaːβrɛm ɛsɬəmtəs. pasana xatəməs, ɬɛti jaːnʲsʲi ɔːmsəs. ɬɛtot xoɬ ɬɛsɬe, isʲi norməɬa xɵːŋxəmtəs. aːɬəŋaja jis, nox kiɬsəŋən. imile ikeɬ pɛɬa lopəɬ: “iki, maː tam aːt nʲaːβrɛm βaːnsəm. min eːβi pox an tajɬəmən, kaːtəɬɬəmən!” ikile lopəɬ: “aːɬ ruβɛma!” imile lopəɬ: “naŋ kuʃ βaːnte! jeːtna jiɬ, pasanən isʲiti ɬɛtoti tɛɬən xajɬɛm, aː min ant oɬɬəmən, ɬaːβəɬti pitɬəmən. iki naŋ tɵːp kaːtɬe, xɵːn ɬɛti jaːnʲsʲi ɔːməsəɬ.” jeːtna jis. imɛŋən ikɛŋən oɬlɔːtəna iɬi keːrəptijəɬsəŋən, βɛrti oɬɬəŋən. i moɬtijən aːt kutəp kɛmən suŋ norəm eːβəɬt ɬɔːɬʲsʲi xɵː paɬatteɬən xoɬʲsʲa joxtəm xɵː pox, xoɬʲsʲa joxtəm βɵːr pox iɬi ɛsɬəmtəs. pasan xɔːnəŋa ʃɵːʃəs, ɬɛt jaːnʲsʲi ɔːmsəs. imile ikeɬ nakɛməsɬe: “mana, kaːtɬe!” ikile ɬɔːɬʲəmtəs, in xɵː poxa kunʃɛməs. jaxa pitsəŋən. ikile jɵːra pittijən in xɵː pox ʃiŋəʃa xasʲ ɔːməsɬa. xɵːn nʲaːβrɛm xɵːjəɬ jɵːra jiɬ, ikile suŋ norəma xasʲ taːɬɬa. βaːntəssəŋən, βaːntəssəŋən, aːɬəŋ pɛɬa jiti pitəs. in xɵː pox jeːɬi nʲɵːxməs: “aŋkɛŋən aːsʲɛŋən, matajəɬ ʃaːɬʲ βɛrɬətən! maː iɬi βoxəɬɬəm, nin xosʲana βɵːɬti pitɬəm. maː ninan an βaːnɬtiɬti βutsʲiɬsəm. jɔːʃəŋ jɔːʃa juβmaɬən, kurəŋ kura juβmaɬən jɵːr kanʃi manti βutsʲiɬsəm. matte muβəŋ jiŋkəŋ aːr oxəp jalanʲ iket xanti xɵː, xanti nɛ nʲoxi kaːʃən βɵːɬɬət, xanti xɵː, xanti nɛ ɬiɬ βujman βɵːɬɬət. sʲi jɔːx piɬa jɵːr kanʃi ɬaŋxaɬəm. maː ki nox pitɬəm, xanti xɵː, xanti nɛ βɵːɬəpseɬ ɬaːsʲkama pitəɬ.” imɛŋən ikɛŋən nɵːməssəŋən nɵːməssəŋən paː ikile lopijəɬ: “poxije, sʲi muβət jalanʲ jɔːx piɬa aːr jɵːr mɔːsəɬ. tam jeːɬpijən aːr ʃɛŋɬəm xɵː jɵːrəɬ ɛsɬiɬsəɬɬe, nɛməɬtijən an pitijəɬsajəβ. ɬu kaʃəɬ, poxije, manɬən ki, sʲi manɬən. xanti xɵː, xanti nɛ sɛm jiŋɬaɬ mɔːsəŋ nox sɔːrɬət.” in poxən ɬɵːmətɬəs, paːjəm βɵːɬəm βɛrəs. aːr oxəp jalanʲ iket piɬa jɵːr kanʃi manəs.
3. xuβ manəs, muj βaːn manəs, i moɬtijən xɵːɬəntijəɬəɬɬe: saːβ sʲaləŋ, sʲaləŋ sij saːtʲəɬʲ. imi ʃaːnʃ eːβəɬt βɵːɬti mɔːsʲ xɵː sʲi βeɬ ʃɵːʃməs. kat oxəp jalanʲ iki βursəɬ ʃoma pɵːrənti pitəs. jalanʲ iki lopəɬ: “mata βorak, muj ʃiβaɬəsən? naŋ muj imi ʃaːnʃ eːβəɬt βɵːɬti mɔːsʲ xɵː an βaːnsən? naŋ nɵːməsɬən, jɵːr sʲi.” jalanʲ iki βursəɬ eːβəɬt iɬi ɛsɬəmtəs, mɔːsʲ xɵː xɔːnəŋa ʃɵːʃɛməs. “jɵːr kanʃi joxətsən?” “maː jɵːr xɵːn tajɬəm? aɬ kasɬəmən!” “siri naŋ ɬɔːɬʲa keːβəŋ lɔːt, kaːrti lɔːta! maː naŋti oxen eːβəɬt βosʲxəmɬɛm!” mɔːsʲ xɵː kaːrti lɔːt, keːβ lɔːta ɬɔːɬʲəmtəs. jalanʲ ikijən sʲiβ nʲɔːrtɛməsi, antəp joɬ maɬattija iɬi ʃɵːjɬəs. jalanʲ iki sʲitɬən βursəɬa ɛsɬəmti βutsʲiɬəs. mɔːsʲ xɵː jeːɬi nʲɵːxmes: “xoɬta manɬən?” jalanʲ iki aŋkərmaɬən mɔːsʲ xɵː ɬuβ xɔːnŋəɬən ɬɔːɬʲ. “in naŋ porajəna jis.” aɬpa xoti βɛrɬa? jalanʲ iki kaːrti lɔːt, keːβ lɔːta ɬɔːɬʲəs. imi ʃaːnʃ eːβəɬt βɵːɬti mɔːsʲ xɵːjən ox pati eːβəɬt kutərsa. jalanʲ iki antəp joɬ βɵːnta kaːrti lɔːt, keːβ lɔːta ɬoŋəs. mɔːsʲ xɵːjən aːɬti keːʃijən kat oxəɬ kat taxija seːβərməsijŋən, kat muβ suŋa ɬarɛməsijŋən. paː jeːɬi nʲɵːxməs: “aːkanʲ βɛnʃəp nɛŋəŋ tɵːrəm tiβtijən taməsʲ pokəsʲ aːɬ βɵːs!” sʲitɬən jeːɬi ʃɵːʃməs.
4. aːr muβ jaŋxəs, aːr jiŋk jaŋxəs, xanti nɛ, xanti xɵː ʃɵːkatti mir piɬa sɔːtəŋ ɬaːɬʲəŋ ɬaːɬʲəsəs, sorsəŋ ɬaːɬʲəŋ ɬaːɬʲəsəs. i moɬtijən xɵːɬəm oxəp jalanʲ iki jiɬ. moɬxa muj βɵːs, tam ikeɬ paː βɵːn, paː jɵːr. jalanʲ iki βaːnaməti pitəs. βursəɬ ʃoma naːβərti pitəs, sɵːxəm an βuɬ. jalanʲ iki lopəɬ: “jiŋkət muβət jaŋxəm βurəs ɬɵːxsɛm iki, mujen xoti jis? muj eːβəɬt pakənsən? aːɬ paɬa, sʲit xoti imi ʃaːnʃ eːβəɬt βɵːɬti mɔːsʲ xɵː.” jalanʲ iki βaːna joxtəs, βursəɬ eːβəɬt iɬ ɛsɬəmtəs. mɔːsʲ xɵː pɛɬa lopəɬ: “kasɬəmən! aɬpa naŋ jɵːr kaʃman jaŋɬən!” “xɵːn kuʃ jɵːr? kasɬəmən ki, kasɬəmən!” jalanʲ ikijən imi ʃaːnʃ eːβəɬt βɵːɬti mɔːsʲ xɵː keːβ lɔːt, kaːrti lɔːta ɬɔːnʲsʲəsi, oxəɬ eːβəɬt nʲɔːrtɛməsi. saːpəɬ βuʃa kaːrtija paː keːβa ɬoŋəɬsa. jalanʲ iki βursəɬa ɛsɬəmti βutsʲiɬəs. mɔːsʲ xɵː jeːɬi nʲɵːxməs: “in naŋ porajen.” jalanʲ iki aŋkərmaɬən mɔːsʲ xɵː ɬuβ xɔːnŋəɬən ɬɔːɬʲ. sʲiti ki paː sʲiti, jalanʲ iki keːβ lɔːt, kaːrti lɔːta ɬɔːɬʲəs. mɔːsʲ xɵːjən oxəɬ eːβəɬt nʲɔːrtɛməsi, saːpəɬɬaɬ βuʃa keːβa paː kaːrtija ɬoŋəs. mɔːsʲ xɵː aːɬti keːʃi aːɬɛməs, xɵːɬəm oxəɬ xɵːɬəm taxija seːβərməsijŋən, xɵːɬəm muβ suŋ pɛɬa ɬarkəmsajŋən. mɔːsʲ xɵː sʲi βɛr jeːtʃəm jupijən ɬuβ muβ taxi pɛɬa ʃɵːʃməs.
5. xuβ muj βaːn muβ xajəs, xuβ muj βaːn jaŋxəs, i moɬtijən xɵːɬəntijəɬ: ɬɵːŋ tur, kaːɬ turən xojat uβteɬ saːtʲəɬ. βaːna joxtəs. mattirən xanti xɵː, xanti nɛ moɬəm put iti kaːβərəɬ. ɬaːpet oxəp jalanʲ iki ɬaːpet taxi pɛɬa ɬaːɬʲəsəɬ. kaɬəŋ xar, ɬaːntəŋ xar aːr pɛɬa joxan iti oβəɬ. mɔːsʲ xɵː uβtəs: “ɬaːpət oxəp aːkɛm iki, xanti xɵː, xanti nɛ eːβəɬt muj βɵːnʲəɬɬən? jɵːr kanʃi ki ɬaŋxaɬən, juβa tiβ!” mɔːsʲ xɵː aːɬti keːʃeɬ aːɬɛməs, ɬaːβɬəsman ɬɔːɬʲ. jalanʲ iki βursəɬ pɛŋ keːɬ nʲarɛməsɬe, βurəs ikeɬ an manəɬ. “xoti jisen? muj maː sormɛm motʃəsən? aːr jiŋk, aːr muβ xajsəmən, jɵːr paː βaːnsəmən. mɔːsʲ xɵː eːβəɬt paɬtaməsən? paɬti nʲoxi xɵːn tajəɬ?” jalanʲ iki βursəɬ kuʃ paːrsəɬɬe, paːrsəɬɬe, sʲiβ kursəɬɬe. iɬ ɛsɬəmtəs, mɔːsʲ xɵː xɔːnəŋa ʃɵːʃɛməs. oxɬi ɬaːɬʲ, kurɬi ɬaːɬʲ tiβəs. jalanʲ iki jɵːra juβəntijən mɔːsʲ xɵː muβəɬ xasʲ tarəptəɬɬe. mɔːsʲ xɵː jɵːra juβəntijən ɬaːpət oxəp jalanʲ iki ɬaːpət oxəp saːxat muβa xasʲ ɬɔːnʲsəɬi. βaːntəssəŋən, βaːntəssəŋən, jalanʲ iki lopijəɬ: “βoɬiɬəmən! jɵːrɬəmən ij kɛmət.” mɔːsʲ xɵː lopəɬ: “antɵː! aːr kaɬi, aːr nʲoxi paratsən. tam jɛməŋ muβ ɵːxtijən ɬɔːɬʲsʲi marɛmən xanti xɵː, xanti nɛ kaɬeɬ aːɬ βaːntəs, sɛm jiŋkəɬ aːɬ ɛtəs!” paː jeːɬi ɬaːɬʲəsti naːrəmsəŋən. jalanʲ iki ɬaːpət oxəp ɬaːpət taxi pɛɬa sɛŋsajət. jɔːʃəɬ kurəɬ isʲiti aːprəŋa βaːntəsɬət. jalanʲ iki jɵːra juβəntijən mɔːsʲ xɵː muβəɬ xasʲ tarəptəɬɬe. i moɬtijən jɛməŋ muβ, soxəŋ muβ nʲoxɬəs. mɔːsʲ xɵː xɵːɬtaɬən moɬxa muj jɵːr tajəs, sʲi kinʲsʲa jɵːra jis, jalanʲ iki aːɬɛməsɬe, nʲaɬ jɔːʃəɬ kurəɬ saː muβa eːβtəssəɬɬe. ruβəŋ tut taxəs, jalanʲ iki sʲiβ βosʲkəsɬe. xɔːjməɬ mɔːsʲ xɵːjən aːra poɬətsa. sʲaɬta tiβəm pɛɬŋajət, sʲaɬta tiβəm nʲaːmaɬtət. sʲitɬən xanti xɵː, xanti mir xosʲa ʃɵːʃəs. βɵːn pɔːrijən, βɵːn jirən βɛrsa. lɵːnʲi pɵːɬən ʃeːɬməŋ oxəŋ oxəŋ, jɵːm jux seːβpi, aːnʃi jux seːβpi eːβijən ɔːmsəɬsa. sʲi βeːsʲəŋ nɛŋəɬ, xorasəŋ nɛŋəɬ piɬa aŋkeɬ aːsʲeɬ xosʲa joxi manəs. sʲi sʲunʲəɬ xɵːɬeɬən in paː si βɵːɬɬət. |
